LA MUVIOLA DI LA MIMORIA (3)

LA MUVIOLA DI LA MEMORIA (3)
(a Gilberto Idonea)

T'ARRICORDI GILBERTU,CARU AMICU,
QUANN' ERAMU ANCORA DU' CARUSI,
NUN SACCIU COMU E PPI QUALI 'NTRICU,
NN' ARRITRUVAMU 'NSEMI, ASSAI CUNFUSI,
---...---
JINTRA LU MUVIMENTU GIOVANILI
DI LU GRANNI PARTITU D' 'A D.C...:
DDA' LU PUPARU MUVEVA LI FILI,
E TU, PPI FORZA, AVIA DIRI SI'!
---...---
TU FUSTI NUMINATU DILIGATU:
JU,LU TO VICI DI LU CUMUNALI!
QUANNU PARRAVI,NUN ERI 'MPACCIATU
E JU M'ABBINIGNAVU SUTTA L' ALI.
---...---
E POI, JIENNU AVANTI, JU E TIA...
SEMPRI NCUCCHIATI...; TI FICI D'AUTISTA,
PIRCHI' TO' MATRI, CANUSCENNU A MIA...
MI DISSI,NUN PIRDILLU MAI DI VISTA!
---...--
MA, PRUSIGUENNU OGNUNU PPI LA VIA...
LI NOSTRI STRATI POI, SI DIJUNTANU...
NNI MARITAMU, E COMU SIA SIA,
PPI 'N-CERTU TEMPU NUN N'HA BAZZICAMU.
---...---
TU FUSTI SEMPRI NTA LI ME' PINZERI,
NUN M'AIU MAI SCURDATU DI TIA...,
E, M'ARRICORDU, COMU FUSSI AJERI,
DI TO' MATRUZZA E LA S' OMELIA!
---...---
ORA CA SEMU DI 'N-ETA' MATURA
ACCIACCATEDDI E.. CHI DIU N'ASSISTA...!
N' ARRITRUVAMU NNI STA' CUGNINTURA...
'N-PUETA A TEMPU PERSU E N'GRANN'ARTISTA!

SAVERIO GRANCAGNOLO
CATANIA 19/09/2017